Cheadaigh RTÉ 106 gníomhaíocht sheachtrach idir Aibreán go Meitheamh agus ní raibh aon íocaíocht nó sochar i gceist le 50% díobh sin, de réir achoimre is déanaí an chraoltóra ar Chlár na nGníomhaíochtaí Seachtracha.
Léiríonn an achoimre nár thug aon cheann de na gníomhaíochtaí níos mó ná €10,000.
Bhí 29% san iomlán laistigh den bhanda íocaíochta €1 – €1,000, agus cuireadh 15% sa bhanda íocaíochta €1,001 – €5,000.
B'ionann gníomhaíochtaí idir €5,001 – €10,000 agus 6%.
Cuireadh tús leis an gclár ar 1 Feabhra agus clúdaíonn na figiúirí is déanaí seo an dara ráithe den bhliain seo.
Clúdaíonn sé na cúig rannán de RTÉ agus caithfidh baill foirne cloí leis an gclár.
De ghnáth is gníomhaíochtaí 'aonuaire' iad gníomhaíochtaí seachtracha, mar imeacht nó táirge a sheoladh agus labhairt ag comhdháil.
Dúirt Ard-Stiúrthóir RTÉ, Kevin Bakhurst, go bhfuil an phríomh-bhreithniú agus cinneadh á dhéanamh “an gceadófar nó nach gceadófar” gníomhaíochtaí dá leithéid “dírithe ar dhualgas RTÉ faoin reachtaíocht craolacháin maidir le neamhchlaontacht”.
Dúirt sé go bhfuil daoine “ag obair le RTÉ a bhfuil leasanna gnó leanúnacha acu” a d’fhéadfadh caidreamh tráchtála a bheith i gceist le branda nó le haonán ar leith.
“Mar chuid de bíonn an duine i mbun raon imeachtaí/gníomhaíochtaí i rith na bliana,” a dúirt sé.
“Tá ceart dlíthiúil agus dlisteanach ag daoine aonair a thagann faoin gcatagóir seo ioncam seachtrach a thuilleamh agus ní gá gurb ionann socruithe tráchtála leanúnacha sa chatagóir seo agus gníomhaíocht sheachtrach ‘aonuaire’,” a dúirt sé.
Dúirt an tUasal Bakhurst go bhfuil an clár “ag teacht le mo thiomantas a chinntiú go soláthraíonn RTÉ níos mó trédhearcachta maidir le gníomhaíochtaí seachtracha”.
Dúirt sé: “Bhí sé beartaithe ag RTÉ ar dtús sonraí achoimre a fhoilsiú lena n-áirítear na hainmneacha ach chuir an Coimisiún um Chosaint Sonraí in iúl do RTÉ go mbeadh gá le buntaca dlíthiúil sonrach i bhfoirm reachtaíochta príomhúla nó tánaisteacha d’fhonn clár poiblí a fhoilsiú ina mbeadh an leibhéal sonraí seo. .
“Thug an Coimisiún le fios freisin go n-úsáidfeadh sé a chumhachtaí reachtúla, dá mbeadh foilsiú den chineál atá leagtha amach thuas molta, in éagmais na reachtaíochta cuí.”
Dúirt an tUasal Bakhurst go bhfuil sé “suntasach, arís eile, nach raibh aon íocaíocht nó sochar i gceist le leath de na gníomhaíochtaí ceadaithe”.
“Is imeachtaí iad seo ina dtugann daoine atá ag obair le RTÉ a gcuid ama go saor ar chúiseanna carthanachta, spóirt, pobail, acadúla agus sóisialta,” a dúirt sé.
