Fillfidh na lúthchleasaithe a bhí san iomaíocht do Fhoireann Éireann i gCluichí Parailimpeacha Pháras 2024 abhaile níos déanaí inniu.
Bhí 35 lúthchleasaí san iomaíocht i naoi spórt dhifriúla ag na cluichí agus chríochnaigh siad le sé bhonn – ceann amháin óir, trí airgead, agus dhá bhonn chré-umha.
Bhí searmanas deiridh na gCluichí Parailimpeacha 2024 ar siúl i bPáras aréir, áit ar thug eagraithe na Fraince anonn go Los Angeles go foirmiúil do chluichí 2028.
Rinne an tAire Turasóireachta, Cultúir, Ealaíon, Gaeltachta, Spóirt agus Meán, Catherine Martin comhghairdeas le gach duine a bhí bainteach le Foireann Éireann.
“Ó na lúthchleasaithe go dtí na cóitseálaithe, na comhlachtaí spóirt, Parailimpeacha Éireann agus Spórt Éireann. Agus ar ndóigh teaghlaigh, cairde agus lucht tacaíochta na lúthchleasaithe a dhéanann cion ríthábhachtach agus insinte.
“Is buaic na mblianta d’obair chrua agus de thiomantas na gCluichí Parailimpeacha. Tá na lúthchleasaithe seo tar éis an chéad ghlúin eile Parailimpeacha a spreagadh agus is mór an chreidiúint iad dá dteaghlaigh, dá gcóitseálaithe agus dá bpobail.
“Tá an Rialtas ag infheistiú go mór sa spórt. Tá sé ag cuidiú lena chinntiú gur féidir lenár lúthchleasaithe ullmhú do na comórtais spóirt idirnáisiúnta mór le rá seo ar an mbealach is fearr is féidir.
“Leanfaimid orainn ag déanamh amhlaidh sna blianta atá le teacht, ní hamháin sa chóras ardfheidhmíochta ach freisin ag leibhéal an phobail ag an bpobal.”
Dúirt an tAire Stáit don Spórt, don Chorpoideachas agus don Ghaeltacht, Thomas Byrne go raibh sé de phribhléid aige a bheith i bPáras le seachtain anuas “ár lúthchleasaithe dochreidte i mbun aicsin a fheiceáil dó féin”.
“Bhí sé iontach an tacaíocht thar a bheith glórach a fuair siad ina gcuid comórtais a fheiceáil agus tá gach éinne an-bhródúil as ár bhfoireann faoi 35.
“Rinne siad go léir ionadaíocht thar barr ar a dtír agus tá roinnt chuimhneacháin fíor-stairiúla cruthaithe acu le coicís anuas a chuimhneofar ar feadh i bhfad.
“Tá an Rialtas, as a thaobh féin, bródúil as tacaíocht a thabhairt d’Fhoireann Éireann leis an maoiniú is mó riamh chun tacú le spórt ardfheidhmíochta,” a dúirt an tAire Byrne.
