Tá sé ráite i dtuarascáil nua ar chúram maolaitheach go bhfuil gá le rochtain chomhionann ar na seirbhísí seo do gach duine a bhfuil gá acu leo, is cuma cá bhfuil cónaí orthu.
Dúradh sa Bheartas Náisiúnta um Chúram Maolaitheach Aosach go bhfuil gá níos mó a dhéanamh chun seirbhísí agus tacaíochtaí d’othair, do theaghlaigh agus do chúramóirí a fheabhsú.
Is seirbhís é cúram maolaitheach atá dírithe ar cháilíocht na beatha a fheabhsú do dhaoine a bhfuil tinneas a chuireann srian ar a mbeatha.
Dúradh sa tuarascáil, de réir mar a leanann daonra na hÉireann ag fás, go bhfuil líon na ndaoine scothaosta ag fás freisin.
Molann sé cuairteanna baile na nDochtúirí Teaghlaigh a mhéadú agus rochtain níos mó ar fhisiteiripe sa bhaile a chinntiú.
Ní mór tacaíocht a thabhairt do dhaoine le go dtabharfar aire dóibh san áit chúraim is fearr leo chomh fada agus is féidir, a dúirt sé.
Molann sé freisin cúram maolaitheach lasmuigh de ghnáthuaireanta oibre a fhorbairt agus a leathnú, lena n-áirítear tacaíochtaí cúraim éigeandála sa phobal agus iontrálacha ospidéil nach bhfuil gá leo a laghdú.
Dúradh go bhfuil gá le tuiscint níos fearr a bheith ag an bpobal ar chúram maolaitheach.
Déanann an polasaí 25 moladh agus bhí an tOllamh Karen Ryan, comhairleoir sa leigheas maolaitheach in Ospidéal an Mater agus in Ospís Naomh Proinsias, Baile Átha Cliath ina cathaoirleach ar an ngrúpa.
Dúirt an tAire Sláinte Stephen Donnelly go bhfuil €2 mhilliún á chur ar fáil in 2024 chun tús a chur le feidhmiú an bheartais nua.
Ag labhairt dó ar Morning Ireland ar RTÉ, dúirt an tOllamh Ryan gur minic gur féidir leis na focail ‘cúram maolaitheach’ eagla a chur ar dhaoine, ach tá an cúram deartha chun cabhrú le cáilíocht na beatha a fheabhsú agus faoiseamh a sholáthar ón anacair fhisiciúil, mhothúchánach, shóisialta agus spioradálta a bhaineann le tinneas tromchúiseach, mar chomh maith le dínit a chur chun cinn ag deireadh an tsaoil.
Dúirt sí freisin go bhfuil daoine ag maireachtáil i bhfad níos faide le tinnis thromchúiseacha, agus go raibh ar chúram maolaitheach oiriúnú dó seo agus bealaí nua oibre a aimsiú, mar shampla athshlánú cuimsitheach a neadú mar chuid den chúram a chuireann sé ar fáil.
Teastaíonn do thoiliú uainn chun an t-inneachar rte-player seo a lódáilBainimid úsáid as rte-player chun inneachar breise a bhainistiú ar féidir leo fianáin a shocrú ar do ghléas agus sonraí a bhailiú faoi do ghníomhaíocht. Déan athbhreithniú ar a gcuid sonraí agus glac leo chun an t-ábhar a lódáil.Sainroghanna a bhainistiú
