Laghdaigh plódú ospidéil an mhí seo, i gcomparáid le Meán Fómhair na bliana seo caite, de réir figiúirí ó Eagraíocht Altraí agus Cnáimhseach na hÉireann.
Bhí 9,635 othar ag fanacht le ligean isteach ar leaba an mhí seo, i gcomparáid le 10,018 i mí Mheán Fómhair anuraidh.
Léiríonn figiúirí an cheardchumainn gurb iad na hospidéil is mó plódaithe an mhí seo ná Ospidéal na hOllscoile, Luimneach le 1,735 ag fanacht, Ospidéal Ollscoile Chorcaí le 1,263 othar ag fanacht agus Ospidéal Ollscoile na Gaillimhe le 959 othar ag fanacht.
Dúirt leas-Ardrúnaí INMO, Edward Matthews, áfach, go bhfuil an tréimhse is deacra den bhliain ag teacht anois agus go dtiocfaidh méadú ar líon na ndaoine a gcuirtear cóir leighis orthu ar thralaithe sna míonna nua.
Tá an ceardchumann ag iarraidh deireadh a chur le caidhpeanna earcaíochta, agus tá éileamh déanta acu ar acmhainn bhreise leapacha.
De réir an INMO, tá 552 othar ag fanacht inniu le ligean isteach ar leaba.
Is é UHL an t-ospidéal is measa le 105 othar ag fanacht.
Chuir figiúirí FSS an leibhéal plódaithe inniu níos ísle ag 417, le 306 othar ar thralaithe roinn éigeandála agus 11 othar ar thralaithe barda.
