Tá Éire ar cheann de 16 thír a ghlac páirt i gCorn Euro Unity na bliana seo, comórtas sacair ina bhfuil dídeanaithe agus pobail ag tacú leo.
Forbraíodh an comórtas, atá ina thríú bliain, in éineacht le UEFA agus leis an UNHCR agus tá sé ar siúl i Nyon, an Eilvéis.
Imreofar 33 cluiche san iomlán sa chomórtas agus ina measc beidh foirne as Éirinn, an Airméin, an Bheilg, an Fhionlainn, an Fhrainc, an Ghearmáin, an Ghréig, an Iodáil, an Laitvia, Málta, an Ísiltír, Tuaisceart Éireann, an tSlóivéin, an Spáinn, an Eilvéis agus an Úcráin.
Beidh gach foireann comhdhéanta d’ochtar imreoirí dídeanaithe agus ceathrar imreoirí ó phobail aíochta na ndídeanaithe.
Bhain foireann na hÉireann an cluiche ceannais amach anuraidh ach bhuaigh an Fhionlainn 2-1 orthu.
Tá sé ráite ag Cumann Peile na hÉireann go bhfuil cuimsiú mar fhócas sa chomórtas.
Dúirt an príomhchóitseálaí Jonathan Tormey gur “buaicphointe beagnach bliain d’obair ón ardú céime, pleanáil na dtrialacha agus ar deireadh thiar an rogha deiridh den scuad é an comórtas.
“Is cur chuige comhpháirtíochta thar cionn a bhí ann idir an FAI, Comhairle Cathrach Bhaile Átha Cliath, TUSLA UEFA agus an UNHCR.
“Beidh dhá cheann déag d'imreoirí in ann imirt i gcomórtas iontach dea-rithithe agus ionadaíocht a dhéanamh ar a dtír uchtaithe ar stáitse domhanda. Beidh sé ina nóiméad an-bhródúil agus an-mhothúchánach teacht as a gcúlra cruatain chun ionadaíocht a dhéanamh ar Éirinn anois.
“Is mór an phribhléid dom féin, d'imreoirí agus don fhoireann a bheith in ann ionadaíocht a dhéanamh ar Éirinn agus léiríonn sé an tionchar a d'fhéadfadh a bheith ag spórt agus peile, sa chás seo, chun aontacht a bhaint amach.”
