Is é an caiteachas bliantúil ar sheirbhísí físshruthaithe ag tomhaltóirí in Éirinn ná €1.1 billiún, laghdú €200 milliún ón mbliain seo caite, in ainneoin go bhfuil méadú tagtha ar an éileamh atá ar shruthú físeáin.
Léiríonn taighde ón soláthraí leathanbhanda Pure Telecom go bhfuil 96% de dhaoine fásta in Éirinn ag sruthú ábhar físe, méadú ar fhigiúr na bliana seo caite de 94%.
Mar sin féin, léiríonn an staidéar go bhfuil méadú tagtha ar líon na ndaoine nach n-íocann as síntiús, chomh maith le titim ar mheánlíon na síntiús in aghaidh an duine fásta.
Fuarthas amach sa suirbhé ‘Connected Lives’ go bhfuil síntiús sruthaithe físeáin amháin nó níos mó curtha ar ceal ag 37% de dhaoine fásta le 12 mhí anuas.
Astu seo, dúirt 45% go ndearna siad amhlaidh mar gheall ar chostais agus dúirt 28% nach raibh an t-ábhar maith go leor.
Chealaigh duine as gach cúigear i bhfabhar seirbhíse eile agus dúirt an céatadán céanna gur cuireadh ar ceal iad toisc go raibh an tréimhse in aisce nó lascainí imithe thart.
Léiríonn an taighde nach bhfuil síntiús sruthaithe físeáin íoctha ag 22% de dhaoine fásta na hÉireann, méadú suntasach ar an 6% a dúirt an bhliain seo caite.
Idir an dá linn, tá meánlíon na síntiús sruthú físeáin in aghaidh an duine fásta imithe ó 2.4 anuraidh go 1.5 i mbliana.
“Ba é an t-ionchas a bhí againn don taighde seo ná go bhfaighfimid, arís eile, go raibh méadú tagtha ar an gcaiteachas ar shruthú in Éirinn,” a dúirt Paul Connell, Príomhfheidhmeannach, Pure Telecom.
“Ina ionad sin, fuaireamar amach, agus muid ag druidim le 100% den daonra ag baint úsáide as seirbhísí sruthú, go bhfuil daoine ag éirí níos frugal faoi na seirbhísí, agus cé mhéad, a bhfuil siad sásta íoc as,” a dúirt an tUasal Connell.
Rinne Censuswide suirbhé ionadaíoch náisiúnta ar 1,006 duine fásta in Éirinn thar ceann Pure Telecom.
