Tá an carthanas leanaí Barnardos ag iarraidh ar an Rialtas a chinntiú go n-áiríonn curaclam na scoile ceachtanna praiticiúla ar thuiscint na hintleachta saorga (AI).
Tá tuarascáil nua eisithe ag Clár Sábháilteachta Ar Líne Barnardos, Exploring AI with Children and Young People, a fuair amach gur chuala 63% de leanaí agus daoine óga faoi AI ó na meáin shóisialta.
Dúirt níos mó ná leath de na leanaí agus na ndaoine óga go bhfuil siad ag iarraidh níos mó a fhoghlaim faoi AI ar scoil, dúirt 93% de na tuismitheoirí a ndearnadh suirbhé orthu go bhfuil imní orthu faoina leanaí ag baint úsáide as AI, agus dúirt 95% de mhúinteoirí nach bhfuair siad aon oiliúint in AI.
“Insíonn leanaí agus daoine óga dúinn go bhfuil gnéithe de AI úsáideach, spraíúil agus gur féidir iad a úsáid ar bhealaí a chabhraíonn leo a ndomhan a thuiscint,” a dúirt Niamh McLoughlin, Comhordaitheoir Chlár Sábháilteachta Ar Líne Barnardos.
“Mar sin féin, tá imní orthu freisin maidir le conas is féidir AI a úsáid chun iad a ionramháil agus chun ionradh a dhéanamh ar a bpríobháideacht”.
“Cé go n-aithnítear na tairbhí a d’fhéadfadh a bheith ag AI do leanaí, ní mór dúinn na rioscaí féideartha a aithint freisin,” a dúirt Ms McLoughlin.
“Léiríonn an tuarascáil seo go leor éiginnteachta ó leanaí, daoine óga, tuismitheoirí agus múinteoirí maidir le AI,” a dúirt sí.
Tá Barnardos ag iarraidh ar an Rialtas acmhainní inrochtana, éasca le tuiscint a sholáthar do thuismitheoirí chun cabhrú leo a gcuid leanaí a threorú go sábháilte agus go muiníneach agus iad i ngleic le AI.
Teastaíonn ón gcarthanas freisin go gcuirfí treoirlínte soiléire agus oiliúint phraiticiúil ar fáil do mhúinteoirí chun mic léinn a mhúineadh agus a threorú go muiníneach maidir le tuiscint agus úsáid AI.
Tiomsaíodh an tuarascáil ag baint úsáide as fócasghrúpaí cáilíochtúla agus suirbhé cainníochtúil idir Bealtaine agus Meitheamh 2024.
Chuaigh an tionscnamh scoilbhunaithe i dteagmháil le breis agus 500 leanbh agus duine óg ó rang a 5 agus a 6 sa bhunscoil agus sa 1ú go dtí an 3ú bliain sa mheánscoil, trí fhócasghrúpaí agus suirbhéanna.
Ghlac 101 tuismitheoir agus 63 múinteoir páirt i suirbhéanna freisin.
Ó 2019 i leith, tá 90,000 leanbh i 800 scoil bainte amach ag Clár Sábháilteachta Ar Líne Barnardos, le cabhair ó Google.org.
