Tabharfaidh an Taoiseach Simon Harris le fios inniu gur gá bearta costais mhaireachtála a bheith mar chuid bhunúsach de Bhuiséad 2025.
Déanfaidh sé an fógra ag an gcomhdháil Náisiúnta um Chomhphlé Eacnamaíochta ar maidin, ag rá go gcreideann sé nach bhfuil buntáistí inláimhsithe fós ag roinnt daoine as feidhmíocht eacnamaíoch láidir na hÉireann.
Ina aitheasc ag an gcomhdháil, déarfaidh an Taoiseach go bhfuil ag éirí go maith le geilleagar na hÉireann agus an líon is airde riamh de 2.7 milliún duine ag obair agus, in éineacht leis sin, tá an boilsciú ag dul i laghad.
Déarfaidh an tUasal Harris, áfach, go bhfuil a fhios aige gur bhraith roinnt daoine go bhfuil a n-airgeadas pearsanta neamhchinnte agus go mb’fhéidir nach seasfaidh siad aon suaitheadh eile de bharr méaduithe ar chostais mhaireachtála.
Chun dul i ngleic leis an bhfadhb seo, agus braistint slándála a sholáthar do dhaoine den sórt sin, déarfaidh an tUasal Harris go gcreideann sé go gcaithfidh tacaíochtaí costais mhaireachtála a bheith mar fhócas arís do Bhuiséad 2025.
Déarfaidh sé go bhfuil gá le maoiniú breise le coinneáil suas leis an daonra atá ag méadú agus le pacáiste costais mhaireachtála agus leasa a chosnaíonn na daoine is leochailí, agus caithfear bannaí cánach ioncaim agus creidmheasanna a innéacsú i gceart arís.
Ní luaitear san óráid creidmheasanna breise fuinnimh, agus táthar ag súil go ndéanfar cinneadh níos gaire don bhuiséad ionas gur féidir measúnú a dhéanamh ar an treocht anuas i bpraghsanna mórdhíola gáis.
