Gabhadh beirt fhear sa Mhí agus i nDún na nGall maidir le dúnmharú oifigeach de chuid an RUC i gCo Dhoire beagnach 50 bliain ó shin agus iarracht ar chomhghleacaí a dhúnmharú.
Tá na fir 73 agus 72 bliain d’aois.
Gabhadh an fear 73 bliain d'aois ar amhras faoi dhúnmharú, agus tá an dara fear á cheistiú faoi chionta arm tine.
Tá baint ag na gabhálacha le dúnmharú an Chonstábla Robert John McPherson agus iarracht ar dhúnmharú an dara oifigeach i nDún Geimhin ar 26 Iúil 1975.
Rinneadh na gabhálacha faoi Bharántas Comhaontaithe Trádála agus Comhair (TaCA) mar chuid de chomhoibríocht leis an PSNI.
Táthar ag súil go dtiocfaidh siad os comhair na hArd-Chúirte i mBaile Átha Cliath níos déanaí inniu.
Ghabh bleachtairí an PSNI an tríú fear i nDún Geimhin, Co. Dhoire.
Táthar ag súil go dtiocfaidh an fear 71 bliain d'aois os comhair Cúirt Giúistísí Dhoire inniu.
Dúirt an PSNI gur eisigh Seirbhís Ionchúiseamh Poiblí Thuaisceart Éireann cinneadh chun an triúr fear a ionchúiseamh roimh thosach feidhme Acht Thuaisceart Éireann (Oidhreacht agus Athmhuintearas) 2023 ar 1 Bealtaine.
