Breis is 14,000 i gcóiríocht éigeandála an mhí seo caite
![](https://img.rasset.ie/00207373-1600.jpg)
B’éigean do 14,303 duine san iomlán teacht ar chóiríocht éigeandála do dhaoine gan dídean an mhí seo caite, lena n-áirítear 9,899 duine fásta agus 4,404 leanbh faoi 18 mbliana d’aois.
D'eisigh an Roinn Tithíochta na figiúirí is déanaí, arb ionann iad agus méadú iomlán de 144 duine ar mhí na Bealtaine, mar chuid dá tuarascáil mhíosúil ar easpa dídine.
I ráiteas ag cur síos ar na figiúirí, dúirt an Roinn go bhfuair 14,303 duine san iomlán lóistín éigeandála ar fud na tíre i mí an Mheithimh.
Tá an figiúr seo suas 144 duine, nó 1%, ar na figiúirí céanna do mhí na Bealtaine.
Áirítear ar na 14,303 duine 9.899 duine fásta agus 4,404 leanbh. Tá 2,093 teaghlach san iomlán san áireamh sna figiúirí.
Dúradh sa tuarascáil chéanna freisin gur fhág 786 duine fásta agus 259 teaghlach san iomlán cóiríocht éigeandála idir Aibreán agus deireadh mhí an Mheithimh nuair a aimsíodh socruithe eile.
Tá an figiúr seo suas 9.4% ar an tréimhse chéanna anuraidh.
I ráiteas tráthnóna Dé hAoine, dúirt an tAire Tithíochta agus Fianna Fáil TD Darragh O’Brien go dtaifeadann an tuarascáil is déanaí “ar an drochuair, méadú breise ar líon na ndaoine a fhaigheann rochtain ar chóiríocht éigeandála”.
“Is ardtosaíocht don Rialtas seo tacaíocht a thabhairt do dhaoine aonair agus do theaghlaigh atá gan dídean.
“Leanann mo Roinn ar aghaidh ag obair go dlúth le húdaráis áitiúla agus lena gcomhpháirtithe seachadta seirbhíse chun an tacaíocht seo a sholáthar chun cur ar chumas teaghlaigh imeacht chuig tionóntacht a bhaint amach nó dul isteach i gcóiríocht éigeandála sa chéad áit a sheachaint.”
Dúirt an tAire O’Brien go bhfuil méadú ar an soláthar tithíochta “ríthábhachtach chun dul i ngleic leis an easpa dídine” ag cur leis go bhfuil an Rialtas ag cur maoiniú de €242 milliún ar fáil do sheirbhísí do dhaoine gan dídean i mbliana – méadú 12.6% ar an mbliain seo caite.
“Aithníonn mo Roinn agus an Rialtas seo na tionchair shuntasacha agus chasta a bhíonn ag easpa dídine ar dhaoine aonair agus ar theaghlaigh agus leanfaidh siad ag díriú ár n-iarrachtaí ar easpa dídine a chosc agus ar líon na ndaoine gan dídean agus na dteaghlach atá gan dídean a laghdú,” a dúirt sé.
I ráiteas, dúirt Pobal Shíomóin Bhaile Átha Cliath go bhfuil líon na ndaoine go náisiúnta atá i gcóiríocht éigeandála anois níos mó ná acmhainn Chnoc 16 i bPáirc an Chrócaigh.
Dúirt Catherine Kenny, Príomhfheidhmeannach Bhaile Átha Cliath Simon, go bhfuil “gá práinneach le gníomh cuimsitheach, comhordaithe chun aghaidh a thabhairt ar bhunchúiseanna na heaspa dídine agus chun an brú ar acmhainní cóiríochta éigeandála a mhaolú”.
“Ní leor a rá gur dúshlán í tithíocht sa tír seo – tá a fhios againn go léir go bhfuil – is í an cheist ná céard atá ar intinn ag an rialtas a dhéanamh faoi sna míonna sula rachaimid chuig na pobalbhreitheanna. ” a dúirt sí.