Cheadaigh an Rialtas ceapachán 11 chomhalta ar an gCoimisiún um Athrú Cóir ar feadh téarma tosaigh trí bliana.
Cuirfidh an Coimisiún seo comhairle ar fáil don Rialtas maidir le conas is ceart d’Éirinn a chinntiú nach bhfágfar aon duine taobh thiar de agus go ndéanfar an t-aistriú go geilleagar atá neodrach ó thaobh na haeráide de go cothrom agus go rachaidh sé chun sochair do chách.
Cuid dá jab a bheidh i mbeartas aeráide agus infheistíocht fhadtéarmach a réamh-mheas agus a threorú.
Díreoidh sé freisin ar na tionchair, na rioscaí agus na deiseanna a d’fhéadfadh a bheith ann de bharr an aistrithe aeráide ar earnálacha éagsúla den gheilleagar agus den tsochaí.
Áiríonn an bhallraíocht 11 duine ainmnithe ó na cúig philéar den chomhphlé sóisialta.
Tá cúlra ag an seisear ball eile i réimsí ar nós cearta daonna agus comhionannas, forbairt scileanna, forbairt tuaithe agus pobail, cuimsiú sóisialta, an t-aistriú geilleagrach glas, agus peirspictíochtaí na hóige.
Is é an saineolaí neamhspleách Ali Sheridan a bheidh ina chathaoirleach ar an gCoimisiún. Is iad seo a leanas an deichniúr ball eile: Vanessa Kiely O'Connor (Colún Talmhaíochta); Michelle Murphy (Colún Pobail agus Oibrithe Deonacha);
Conor Minogue (Colún an Fhostóra); Oisín Coghlan (Colún Comhshaoil); Ryan McKinney (Colún na gCeardchumann); Diarmuid Torney (Saineolaí Neamhspleách); Evan Boyle (Saineolaí Neamhspleách); Seamus Boland (Saineolaí Neamhspleách); Suresh Kumar (Saineolaí Neamhspleách); Tanya Ward (Saineolaí Neamhspleách).
Dúirt an tAire Comhshaoil, Aeráide agus Cumarsáide, Eamon Ryan, gur cloch mhíle thábhachtach iad na ceapacháin do bheartas aeráide na hÉireann. Dúirt sé go gcaithfidh an Coimisiún a bheith solúbtha agus nuálaíoch, agus go gcinnteoidh bunú an Choimisiúin nach ceist pholaitiúil deighilte a bheidh i gceist le beartas aeráide.
“Cinnteoidh sé go mbeimid nuálaíoch, solúbtha agus thar aon rud eile dírithe ar dhaoine ar an mbealach a bheimid ag tabhairt faoin aistriú seo chuig poist ghlasa nua, talmhaíocht ghlas agus iompar glas,” a dúirt sé.
Dúirt an Cathaoirleach Ali Sheridan: “Tá deis againn, agus freagracht, a chinntiú go bhfuil an t-aistriú atá romhainn cothrom. Rud a fhéachann thar laghduithe astuithe chun ár sochaí agus ár ngeilleagar a athrú chun rathúlachta agus ag an am céanna ag freastal ar riachtanais shóisialta agus ag urramú teorainneacha pláinéadacha.”
