Tá clár píolótach nua ceadaithe ag an gComh-Aireacht chun a chinntiú go gcloistear glórtha agus tuairimí leanaí i gcóras na gcúirteanna.
Mar chuid de Bhuiséad 2024, tá €3 mhilliún á chur ar fáil chun Tionscadal Píolótach Abhcóide Cúirte Leanaí a bhunú agus chun scéim a chur i bhfeidhm chun tuarascálacha saineolaithe a mhaoiniú.
Leanann na bearta moltaí a foilsíodh níos luaithe i mbliana in athbhreithniú a scrúdaigh ról tuarascálacha den sórt sin i bpróiseas an dlí teaghlaigh. Is féidir leis an gcúirt na tuarascálacha a ordú ar ghnéithe de leas linbh nó ar a dtuairimí agus a mianta.
Dúirt an tAire Dlí agus Cirt, Helen McEntee gur féidir leis na tuarascálacha a chinntiú go n-éistfear le glórtha leanaí a bhfuil tionchar ag briseadh suas teaghlaigh orthu agus go gcosnófar a gcuid riachtanas laistigh den chóras ceartais. Dúirt sí go mbeadh a cuid oifigeach in ann tosú ar scéim a fhorbairt chun na tuarascálacha seo a mhaoiniú ón mbliain seo chugainn mar go bhféadfadh costais na dtuarascálacha a bheith ina mbac ar theaghlaigh áirithe.
Tá Coiste Breithiúnach bunaithe ag an bPríomh-Bhreitheamh, Donal O’Donnell chun treoirlínte a fhorbairt maidir le coimisiúnú, ábhar agus úsáid tuarascálacha leasa. Tá grúpa oibre bunaithe freisin agus tiocfaidh siad le chéile an tseachtain seo chugainn le scrúdú a dhéanamh ar na socruithe reatha maidir le glór an linbh a chloisteáil i gcásanna dlí teaghlaigh.
Dúirt an tAire McEntee go raibh na bearta ríthábhachtach chun córas ceartais teaghlaigh a chinntiú a bheadh “níos freagraí, níos comhsheasmhaí” agus a chuir “leanaí ina chroílár”.
