Tá fear á cheistiú i nDún Dealgan, Co Lú tar éis do ghluaisteán a bheith fuadach i mBéal Feirste le cailín 17 bliain d'aois istigh, ar éirigh léi éalú i Lios na gCearrbhach.
De réir ráitis ón PSNI, fuair póilíní tuairisc go luath maidin inné go raibh feithicil a bhí páirceáilte i gceantar Ascaill na Lus, goidte le cailín atá fós sa charr.
Lean an ráiteas: “Stop an carr ar Bhóthar Saintfield, Lios na gCearrbhach áit ar éalaigh an cailín ón bhfeithicil.
“Chonacthas an carr tamall gairid ina dhiaidh sin ag tiomáint ar luasanna os cionn 100msu ar an A1 agus rinne oifigigh teagmháil lenár gcomhghleacaithe sa Gharda Síochána chun a chur in iúl dóibh go raibh an fheithicil ag tiomáint i dtreo na teorann.
“Ag thart ar 2.20rn, fuaireamar tuairisc ón AGS ag rá go raibh an carr goidte aimsithe acu agus gur ghabh siad fear 25 bliain d’aois i nDún Dealgan, tá sé fós faoi choimeád ag an bpointe seo.
“Níor gortaíodh an t-íospartach ach fágadh í faoi chrith ag an gcruachás a bhí aici. Ar an dea-uair nílimid ag déileáil le haon taismeach tar éis iompar an-chontúirteach agus meargánta a rinne an t-amhrastach i gceist.
“D'áirithigh sár-obair chomhoibritheach eadrainn féin agus ár gcomhghleacaithe sa Gharda Síochána gur thángthas ar an bhfeithicil seo agus gur gabhadh an t-amhrastach.”
I ráiteas, dúirt na gardaí go raibh an carr lonnaithe níos déanaí ar Bhóthar an Iúir i nDún Dealgan agus gur gabhadh fear ag láthair in aice láimhe.
Tá sé faoi choinneáil ag stáisiún Garda i gCo. Lú faoi láthair.
Ghabh gardaí an fheithicil agus baineadh í le haghaidh scrúdú teicniúil.
