Cuardach d'amhrastach tar éis triúr ban a fuarthas marbh sa RA
![](https://img.rasset.ie/0020923d-1600.jpg)
Tá mórchuardach póilíneachta ar bun sa Bhreatain ar fhear 26 bliain d'aois a bhfuil amhras faoi thriúr ban a dhúnmharú.
Táthar ag iarraidh Kyle Clifford, as an mBóthar Buí, tuaisceart Londain, mar gheall ar bhás na mban a fuarthas gortaithe go marfach i dteach i Ashlyn Close, Bushey, Hertfordshire, díreach tar éis 7pm inné.
Thug póilíní Hertfordshire rabhadh go bhféadfadh sé a bheith fós i seilbh arm, b'fhéidir crosbhogha.
Creideann imscrúdaitheoirí go bhféadfadh an tUasal Clifford a bheith i Hertfordshire nó i dtuaisceart Londain.
Cuireadh oifigigh agus criúnna leighis éigeandála, lena n-áirítear dhá otharcharr aeir chuig an teach, ach fuair na mná, a raibh gaol acu leo, bás ar an láthair.
Dúirt comhairleoirí áitiúla do cheantar Bushey Thuaidh go raibh siad “thar a bheith buartha agus faoi bhrón” le scéala na mbásanna.
Dúirt an Bleachtaire-Cheannfort Rob Hall ó Aonad Mórchoireachta Bedfordshire, Cambridgeshire agus Hertfordshire: “Cé go bhfuil muid fós i gcéimeanna tosaigh an imscrúdaithe seo, táimid gníomhach ag lorg Kyle Clifford a chreidimid a d'fhéadfadh a bheith i gceantair Hertfordshire nó i dtuaisceart Londain,” dúirt sé.
![](https://img.rasset.ie/00209243-614.jpg?ratio=1.78)
Dúirt an Det Supt Hall nár cheart dul i dteagmháil leis an Uasal Clifford.
Dúirt sé go leanfar le fiosrúcháin póilíní chun “cúinsí iomlána an méid a tharla” ag an teach a chinneadh.
Dúirt urlabhraí de chuid Sheirbhís Otharchairr Oirthear Shasana gur fhreagair criúnna glao chuig áitreabh in Ashlyn Close tráthnóna inné.
Dúirt an t-urlabhraí: “Cuireadh trí otharcharr, feithicil mearfhreagartha, feithicil oifigigh otharchairr, an Fhoireann Freagartha um Limistéir Ghuaiseacha, Otharcharr Aeir Essex agus Herts agus Otharcharr Aeir Londain chuig an láthair.
“Faraor, in ainneoin iarrachtaí is fearr na foirne, fógraíodh go raibh triúr ban marbh ag an láthair.”
![](https://img.rasset.ie/00209244-614.jpg?ratio=1.78)
Dúirt comhairleoirí áitiúla an cheantair Louise Nicolas, Alan Matthews agus Paul Richards: “Táimid thar a bheith buartha agus faoi bhrón leis an scéala tragóideach gur chaill triúr ban a mbeatha in eachtra fhoréigneach a tharla i gcroílár ár bpobal áitiúil.
“Mar chomhairleoirí North Bushey, déanaimid ár smaointe agus ár gcomhbhrón a chur in iúl dá dteaghlaigh agus dóibh siúd go léir a ndeachaigh siad i gcion orthu.”
Dúirt comharsa, nár theastaigh uaithi go n-ainmeofaí í, nach raibh aithne mhaith aici ar na híospartaigh ach dúirt gur teaghlach cairdiúil iad.