Déagóir maraithe in imbhualadh bus agus r-scútar i bPort Láirge
![](https://img.rasset.ie/001eab28-1600.jpg)
Tá déagóir básaithe agus gortaíodh duine eile go dona tar éis imbhualadh idir bus agus r-scútar i bPort Láirge go moch ar maidin inniu.
Tharla an eachtra thart ar 1.10rn ar an R680 Bóthar Chorcaí.
Fógraíodh go raibh buachaill sna déaga a bhí ag taisteal ar an r-scútar marbh ag an láthair. Tugadh an dara buachaill sna déaga, a bhí ar an r-scútar freisin, go hOspidéal Ollscoile Phort Láirge le gortuithe tromchúiseacha.
Ní raibh tiománaí an bhus gortaithe. Ní raibh aon phaisinéirí ar an mbus ag am an imbhuailte.
Tá Bóthar Chorcaí dúnta ó Ollscoil Teicneolaíochta an Oirdheiscirt go dtí an Cuarbhóthar le scrúdú teicniúil a dhéanamh ar an láthair agus tá atreoruithe áitiúla i bhfeidhm.
Tá Gardaí ag éileamh ar fhinnéithe ar bith, go háirithe aon úsáideoirí bóithre a bhféadfadh píosaí scannáin ceamara a bheith acu (lena n-áirítear dash-cam) agus a bhí ag taisteal ar Bhóthar Chorcaí i gCathair Phort Láirge idir 12.45am agus 1.15am, dul i dteagmháil le Stáisiún Gardaí Phort Láirge ar 051 305300, leis an nGarda. Líne Rúnda ar 1800 666 111 nó aon stáisiún gardaí.