Dlí chun saoránacht a bhaint a achtú roimh bhriseadh na Dála
![](https://img.rasset.ie/0020561a-1600.jpg)
Tá an reachtaíocht le ceadú deimhnithe saoránachta a chúlghairm le hachtú roimh shos samhraidh na Dála, éistfidh an Chomh-aireacht.
Inseoidh an tAire Dlí agus Cirt Helen McEntee le comhghleacaithe Rialtais nach gcuirfí an próiseas seo i bhfeidhm ach amháin i gcúinsí an-teoranta.
Faoin bplean seo má bhreathnaítear ar dhuine ar bronnadh saoránacht air anseo mar bhagairt chreidiúnach don Stát is féidir an saoránacht sin a tharraingt siar.
Beidh sé seo amhlaidh freisin má fhaightear amach go bhfuil saoránacht faighte acu trí chalaois.
Tá na bearta seo cuimsithe i nuashonrú fada a thabharfaidh Ms McEntee os comhair na Comh-aireachta ar chúrsaí inimirce, lena n-áirítear Comhaontú Imirce agus Tearmainn an AE.
Beidh sé á phlé sa Dáil agus sa Seanad an tseachtain seo.
Tá imní léirithe ag páirtithe an fhreasúra faoin gComhaontú, ach is dócha go mbeidh sé ceadaithe ag an dá theach den Oireachtas agus ag an Rialtas ansin plean chun bonn a chur faoi le reachtaíocht nua.
Áireofar leis sin slándáil teorann níos láidre, agus beidh níos mó bailithe méarloirg agus grianghraif de dhaoine nua ag teacht isteach.
Bheadh próiseáil tapa ag ionaid ainmnithe freisin do dhaoine a thagann anseo gan doiciméid nó ó thíortha atá saor go ginearálta ó chogadh agus ó ghéarleanúint.