Tá tine tar éis briseadh amach ag láthair a bhí á athchóiriú chun freastal ar iarratasóirí ar chosaint idirnáisiúnta (IPAanna) sa Chúlóg, tuaisceart Bhaile Átha Cliath.
Tá trí aonad de Bhriogáid Dóiteáin Bhaile Átha Cliath ag sean-mhonarcha Crown Paints ar Bhóthar Mhullach Íde i mBaile Átha Cliath anocht.
Tá píobáin curtha thar an mballa agus tá deatach ag teacht ón bhfoirgneamh agus fir dóiteáin ag obair chun an tine a mhúchadh.
Bhí an suíomh níos luaithe an tseachtain seo mar chroílár agóidí, foréigean agus loitiméireacht ag grúpaí daoine atá i gcoinne a úsáid mar chóiríocht d’iarrthóirí tearmainn.
Gortaíodh garda slándála, caitheadh buamaí peitril agus tinte ealaíne, cuireadh tochaltóir trí thine agus rinneadh damáiste do dhá charr de chuid an Gharda Síochána le linn na n-agóidí Dé Luain.
Gabhadh agus cúisíodh fiche duine, 15 acu le feiceáil sa chúirt oíche Dé Luain, agus tháinig seisear eile os comhair cúirte tráthnóna Dé Máirt.
Dúirt an Roinn Comhtháthaithe go raibh moill ar feadh roinnt míonna le hobair chun suíomh iar-mhonarcha Crown Paints a thiontú ina chóiríocht do thart ar 550 iarratasóir IP.
Tá campa agóide ar bun lasmuigh d’iar-shuíomh monarchan Crown Paints ó mhí an Mhárta.
Tuilleadh le leanúint.
