Tá maoiniú €6 milliún le fógairt ar maidin chun spásanna oibre ealaíontóirí a sholáthar ar fud na tíre.
Is ceist leanúnach í an ghanntanas spásanna oibre agus stiúideonna oiriúnacha ar fud na tíre atá roimh ealaíontóirí agus grúpaí pobail.
Níos déanaí ar maidin, beidh an tAire Ealaíon, Catherine Martin le maoiniú de €6 milliún a fhógairt chun cabhrú leis na bearnaí a réiteach.
Léiríonn taighde a rinne an Roinn le blianta beaga anuas go bhfuil an t-éileamh ar spásanna oibre ealaíontóirí i bhfad níos airde ná an soláthar agus go bhfuil ganntanas forleathan spásanna cruthaitheacha.
Cuirfear an maoiniú ar fáil d’údaráis áitiúla i scéim phíolótach nua chun tacú le forbairt spásanna cuí i bhfoirgnimh fholmha atá ann cheana féin.
Cuirfear deontais chaipitil suas le €300,000 ar fáil do go leor de na ceantair dlúthdhaonra lena n-áirítear Comhairle Cathrach Chorcaí agus Dún Laoghaire Ráth an Dúin, agus beidh deontais suas le €150,000 ar fáil do na húdaráis áitiúla eile.
Tagann sé agus ealaíontóirí ag eagrú taispeántais i mBaile Átha Cliath 8 chun aird a tharraingt ar a gcuid frustrachas faoin méid a deir siad faoi ghanntanas leanúnach spásanna cruthaitheacha ina gceantar.
Deir na healaíontóirí seo go bhfuil gá níos mó a dhéanamh chun tacú lena gcuid oibre, agus tá cabhair bhreise á lorg acu ó fhorbróirí ar scála mór, a deir siad atá ag athrú an bhonneagair i lár na cathrach.
Tá siad ag iarraidh freisin ar Chomhairle Cathrach Bhaile Átha Cliath agus ar an Rialtas tacaíochtaí breise a chur ar fáil.
