Tá an tuarascáil deiridh faighte ag an Roinn Leanaí maidir leis an gcéad chéim d’imscrúdú Choimisiún Farrelly ar sheirbhís míchumais san oirdheisceart agus nithe gaolmhara, ar a dtugtar cás ‘Grace’ ar shlí eile.
Bunaíodh an Coimisiún chun imscrúdú a dhéanamh ar chúram agus ar chosaint ‘Grace’, bean atá faoi mhíchumas intleachta, agus daoine eile in iar-theach altrama san oirdheisceart, a bhí ina ábhar do líomhaintí mí-úsáide.
Chuir an Coimisiún Imscrúdúcháin a bhfuil Marjorie Farrelly SC ina chathaoirleach agus ina bhall aonair, tús lena chuid oibre in 2017.
Bhí tuarascáil deiridh ar obair Chéim 1 an Choimisiúin le cur faoi bhráid an Aire Sláinte laistigh de bhliain amháin ó cuireadh tús lena chuid oibre.
Mar sin féin, tugadh roinnt síneadh ama le cur ar chumas an Choimisiúin a chuid oibre a dhéanamh de réir a Théarmaí Tagartha.
I ráiteas, dúirt an Roinn go bhfuil “obair shubstaintiúil” an Choimisiúin ar Chéim 1 den imscrúdú críochnaithe anois agus go bhfuiltear ag díriú anois ar na costais is iníoctha le finnéithe a tháinig os a chomhair a thabhairt chun críche.
Chuir an Coimisiún ráiteas ar fáil don Roinn freisin maidir le Cuid X de Théarmaí Tagartha an imscrúdaithe.
Baineann Cuid X le himscrúduithe roimhe seo lena n-áirítear moltaí ó Conor Dignam SC maidir le Cúram agus Cinnteoireacht i leith Daoine Eile, Gníomhartha FSS maidir le himscrúdú a dhéanamh ar dhaoine eile agus Nochtadh Cosanta lena n-áirítear an chaoi a ndéileálann FSS le ‘séidirí’.
Tá sé ráite ag an Roinn go gcuirfear an tuarascáil agus an ráiteas faoi bhráid Oifig an Ard-Aighne anois le haghaidh comhairle dlí.
Tar éis dhá thuarascáil eatramhacha a bheith foilsithe ag coimisiún Farrelly in 2021, chuir an Teachta Dála de chuid Fhianna Fáil John McGuinness, a chabhraigh le cás ‘Grace’ a nochtadh, síos air mar “an scannal is mó dár gcuid ama”.
Ag labhairt dó le linn díospóireachta Dála, dúirt an tUasal McGuinness go raibh go leor eolais i mbéal an phobail cheana féin le cruthú go raibh teipthe ar Grace ag an stát.
Fuarthas amach sa dá thuarascáil eatramhacha, a foilsíodh i Meán Fómhair 2021, go raibh “teipeanna córasacha” ag oifigigh maidir le láimhseáil chás Grace.
