Tá cuóta nua de 150 cead fostaíochta fógartha ag an Rialtas d’iascairí mara chun aghaidh a thabhairt ar ghanntanas scileanna i loingeas iascaireachta na hÉireann.
Ciallaíonn sé go bhfuil ról iascairí mara i gcabhlach iascaireachta na hÉireann incháilithe anois do Chead Fostaíochta Ginearálta le riachtanas íostuarastail de €34,000, suas le cuóta de 150 cead.
In 2015, bhunaigh an Roinn Dlí agus Cirt Scéim Oibre Neamhthipiciúla (AWS) d’iascairí ó lasmuigh den Limistéar Eorpach Eacnamaíoch (LEE) chun aghaidh a thabhairt ar éilimh dúshaothraithe agus gháinneála oibrithe neamhdhoiciméadaithe neamh-LEE ar chatagóirí áirithe soithí i gcabhlach iascaireachta na hÉireann.
Tugadh isteach an cuóta nua ceadanna tar éis moladh ó ghrúpa tras-rialtais ról iascairí mara a aistriú ón AWS go dtí an Córas Cead Fostaíochta.
Dúirt an Roinn Fiontar, Trádála agus Fostaíochta go ndeachaigh siad i gcomhairle le hionadaithe earnála agus oibrithe imirceacha agus gur thug an próiseas comhairliúcháin sin eolas do chuimsiú na n-iascairí mara neamh-LEE sa chóras ceadúnais fostaíochta agus na rialacháin a bhaineann leis.
“Má osclaítear an cuóta seo cabhrófar le dul i ngleic le ganntanas saothair san earnáil thábhachtach seo,” a dúirt an tAire Stáit do Ghnó, Fostaíochta agus Miondíol, Emer Higgins.
“De bharr go bhfuil lánfhostaíocht sroichte againn le breis agus 2.7 milliún duine ag obair anseo, tá roinnt scileanna atá ag éirí níos deacra d’fhostóirí a rochtain in Éirinn agus ar fud an LEE, agus is sampla iontach é iascaire mara,” a dúirt an tUasal Higgins.
“Is forbairt thar a bheith dearfach é seo mar go mbeidh rochtain anois ag iascairí mara neamh-LEE ar na buntáistí agus na cosaintí céanna agus atá ag náisiúnaigh neamh-LEE eile atá fostaithe sa Stát, go háirithe ó thaobh teidlíochtaí agus cosaintí de,” a dúirt sí.
Dúirt an Roinn go ndéanfaidh aistriú ról iascairí mara chuig an gCóras Cead Fostaíochta sruthlíniú ar an bpróiseas ceada agus go mbeidh sé níos éasca iascairí mara neamh-LEE a earcú.
