Lorgóidh an tAire Airgeadais faomhadh na Comh-Aireachta do straitéis a fhágfaidh go mbeidh sé de cheangal ar gach Roinn Rialtais agus ar gach comhlacht Stáit airgead tirim a ghlacadh nó íocaíochtaí airgid thirim a éascú.
Inseoidh Jack Chambers dá chomhghleacaithe Comh-Aireachta go bhfuil airgead tirim fós mar an modh íocaíochta is fearr le go leor daoine sa tsochaí, go háirithe daoine scothaosta, agus tá sé tábhachtach go leanfaidh siad ar aghaidh ag úsáid é ina saol laethúil.
Leagann an straitéis amach freisin nach mór íocaíochtaí airgid thirim a chur san áireamh in aon chonarthaí a chomhaontófar amach anseo idir ranna Rialtais agus tríú páirtithe a lorgaíonn íocaíocht ón bpobal.
Ar leithligh, tabharfaidh an tAire Tithíochta Darragh O’Brien plean gníomhaíochta faoi bhráid na Comh-Aireachta chun tuilleadh pleanálaithe a fháil chun seachadadh tithe agus infrastruchtúr a bhrostú.
Áireofar leis seo méadú ar líon na n-áiteanna mac léinn atá ar fáil ar chúrsaí pleanála creidiúnaithe.
Tabharfar isteach scéim athlonnaithe chun lucht pleanála ón tír seo atá ag obair thar lear a spreagadh le filleadh abhaile.
Beidh feachtas earcaíochta spriocdhírithe ar bun freisin sa RA agus sa Limistéar Eorpach Eacnamaíoch chun pleanálaithe gairmiúla a mhealladh go hÉirinn.
Idir an dá linn, iarrfaidh an tAire Dlí agus Cirt Helen McEntee ar an Rialtas Leas-Choimisinéir nua a cheapadh don Gharda Síochána chun an ról atá folamh ó mhí an Mhárta seo caite a líonadh.
Leanann sé comórtas oscailte a reáchtáil an tSeirbhís um Cheapacháin Phoiblí.
Tuigtear go raibh roinnt iarratasóirí ar an bpost agus go raibh iomaíocht ghéar ann don ról.
