Tá an Taoiseach Simon Harris tagtha chun na Polainne le haghaidh cruinniú déthaobhach le Príomhaire na Polainne Donald Tusk.
Leanann sé cruinnithe i bpríomhchathair na hÚcráine, Kyiv inné áit Shínigh an tUasal Harris meabhrán comhpháirteach ar réimsí comhoibrithe le hUachtarán na hÚcráine Volodymyr Zelensky.
Le linn cruinnithe déthaobhacha a bheidh ar siúl ar maidin in oirdheisceart chathair na Polainne Rzeszów, pléifidh an tUasal Harris agus an tUasal Tusk an caidreamh idir Éirinn agus an Pholainn agus Uachtaránacht na Polainne ar an Aontas Eorpach a thosóidh i mí Eanáir.
Cuirfidh an Taoiseach a mhacasamhail sa Pholainn ar an eolas faoin gcruinniú a bhí aige i Kyiv leis an Uasal Zelensky.
Pléifidh siad freisin saincheisteanna slándála Eorpacha agus an staid reatha feadh theorainn na Polainne leis an mBealarúis.
I mí an Mheithimh, thug rialtas na Polainne crios eisiatachta 200 méadar isteach feadh stráice mór den teorainn mar iarracht srian a chur ar imirce neamhrialta.
Tá rialtas na Polainne tar éis teacht faoi cháineadh ó eagraíochtaí neamhrialtasacha agus ó eagraíochtaí cearta daonna a dúirt nach bhfuil siad in ann cúnamh daonnúil a sholáthar d'imircigh a thrasnaíonn an teorainn.
Táthar ag súil go bpléifidh an tUasal Harris agus an tUasal Tusk freisin an tubaiste dhaonnúil leanúnach sa Mheánoirthear.
