Is mó i bhfad an seans go dtuairisceodh daoine atá ina gcónaí i gceantair dhíothacha ar fud na hÉireann drochshláinte nó míchumas, de réir taighde nua ó Pobal.
Oibríonn an ghníomhaireacht thar ceann an Rialtais chun tacú le pobail agus le gníomhaireachtaí áitiúla cuimsiú sóisialta agus forbairt a bhaint amach.
Dúirt Pobal go léiríonn na torthaí an gá atá le dul i ngleic le bearnaí éagothroime sláinte agus soláthar láidir seirbhísí sláinte agus cúraim shóisialta a chinntiú i gceantair nach bhfuil chomh saibhre.
Fuarthas amach go bhfuil ceithre huaire go leith níos dóchúla go dtuairisceodh daoine a bhfuil cónaí orthu sna ceantair is mó faoi mhíbhuntáiste “nach bhfuil an tsláinte go maith” acu i gcomparáid leo siúd sna ceantair is saibhre.
Tá dhá oiread seans ann go dtuairisceodh daoine atá ina gcónaí sna ceantair is mó faoi mhíbhuntáiste go bhfuil míchumas acu i gcomparáid leo siúd i gceantair shaibhre.
Tá rátaí míchumais tuairiscithe ag leanaí atá ag fás aníos i gceantair faoi mhíbhuntáiste nach bhfuil le feiceáil ach i measc daoine atá gar d’aois scoir i gceantair shaibhre.
Fuarthas amach sa tuarascáil freisin go bhfuil ráta beagán níos airde míchumais ag ceantair uirbeacha dhíothacha i gcomparáid le ceantair thuaithe faoi dhíothacht
Dúirt Alana Ryan, Bainisteoir Taighde agus Beartais Pobal, a bhí mar chomhúdar ar an tuarascáil, go bhfuil “rátaí míchumais beagán níos ísle i gceantair thuaithe ná mar atá i gceantair uirbeacha”.
Rinne an taighde crostagairt ar shonraí ó Dhaonáireamh 2022 in aghaidh Innéacs Díothachta Pobal HP agus fuarthas amach go raibh gaol “buailte” idir na leibhéil díothachta i gceantar agus na rátaí drochshláinte agus míchumais a tuairiscíodh.
