Deir údaráis sláinte na hÉireann nach bhfuil aon chás in Éirinn den bhrú mpox atá ag déanamh imní san Afraic.
Mar gheall ar fhoghrúpaí clade 1 den víreas (1a agus 1b) tá méadú gan fasach ar chásanna san Afraic.
Tuairiscíodh cás amháin clade Ib mpox sa tSualainn.
Dúirt an tIonad Faire um Chosaint Sláinte nár aimsíodh aon chásanna de chlad 1a nó 1 b in Éirinn.
Dúirt sé freisin go bhfuil na cásanna eile de Mpox anseo fós íseal, le sé cinn a tuairiscíodh i mbliana go dtí seo.
Sin i gcomparáid le 13 chás anuraidh agus 227 cás in 2022.
Clade1 mpox ba chúis leis na cásanna go léir anseo.
Dúirt an HPSC gurb é seo an cineál ba chúis leis an ráig dhomhanda ag tús na bliana 2022, a chuir isteach go príomha ar fhir aeracha, déghnéasacha agus eile a mbíonn gnéas acu le fir.
Níos luaithe an mhí seo, d’fhógair Ard-Stiúrthóir na hEagraíochta Domhanda Sláinte Tedros Adhanom Ghebreyesus go raibh an mpox ina éigeandáil sláinte poiblí ar údar imní idirnáisiúnta é, mar gheall ar an staid san Afraic.
Scaipeann an víreas mpox trí dhlúth-theagmháil, lena n-áirítear teagmháil le gríos craicinn duine a bhfuil mpox air.
Breathnaítear ar an riosca leathadh laistigh den phobal i gcoitinne a bheith an-íseal.
Tá sé ráite ag an WHO nach é mpox an Covid nua.
Mar fhreagra ar an méadú ar chásanna mpox in 2022 in Éirinn, chuir FSS clár vacsaíne ar fáil do ghrúpaí leochaileacha riosca.
Seachadadh níos mó ná 11,000 dáileog vacsaíne, le breis agus 5,000 duine vacsaínithe go hiomlán, rud a dúirt an FSS a bhí ar cheann de na cláir vacsaíne mpox is fearr feidhmíochta san Eoraip.
Deir údaráis sláinte go bhfuil dóthain soláthairtí vacsaíne mpox ag Éirinn trí chóras soláthair an AE chun freastal ar aon riachtanas dóchúil sna míonna amach romhainn.
Mar gheall ar theacht chun cinn clade nua mpox san Afraic, agus an éigeandáil sláinte poiblí a d’fhógair an WHO, tá FSS chun breithniú a dhéanamh ar an ngá atá le clár vacsaíne nua.
Cuirfidh an Coiste Comhairleach Náisiúnta um Imdhíonadh comhairle air maidir leis an tsaincheist seo.
