Tá cuireadh á thabhairt do dhaoine ar fud na tíre páirt a ghlacadh i suirbhé píolótach Daonáirimh inar féidir leo, don chéad uair i stair na hÉireann, a bhfoirm daonáirimh a líonadh ar líne.
Tá an tionscadal mar chuid d’ullmhúcháin na Príomh-Oifige Staidrimh do Dhaonáireamh 2027.
Tá cuireadh tugtha do 20,000 teach i 44 ceantar i sé chontae páirt a ghlacadh sa chlár píolótach atá ag tástáil roinnt ceisteanna nua agus cé chomh maith agus a oibríonn an fhoirm ar líne – ach is féidir le daoine rogha a dhéanamh leagan páipéir a líonadh más mian leo.
Níos luaithe an mhí seo cuireadh litreacha cuirí chuig tithe sna ceantair phíolótacha roghnaithe i gcontaetha Chorcaí, Bhaile Átha Cliath, Chill Chainnigh, Lú, Mhaigh Eo agus Uíbh Fhailí.
Mar sin féin tá fáilte roimh dhaoine atá ina gcónaí taobh amuigh de na ceantair seo páirt a ghlacadh, mar is féidir le haon duine an fhoirm daonáirimh ar líne a líonadh trí logáil isteach ar censuspilot.ie.
Tá roinnt ceisteanna Daonáirimh nua scríofa ag an bPríomh-Oifig Staidrimh, chomh maith le nuashonruithe ar cheisteanna daonáirimh atá ann cheana féin, tar éis comhairliúchán poiblí ar ábhar féideartha Dhaonáireamh 2027.
I measc na gceisteanna nua ar Shuirbhé Píolótach an Daonáirimh tá:
- áit a bhfuil carr(anna) tí páirceáilte thar oíche [to gather insights on potential placement of electric chargers];
- cibé an bhfuil d’inscne mar an gcéanna nó difriúil leis an inscne a taifeadadh tráth breithe;
- do chlaonadh gnéasach;
- conas a dhéanfá féintuairisc ar do mheabhairshláinte.
Déanfar anailís ansin ar fhreagraí ar an suirbhé píolótach seo agus úsáidfear iad chun treoir a thabhairt do mholtaí deiridh an Ghrúpa Chomhairligh Daonáirimh ar cad a rachaidh isteach i nDaonáireamh 2027, a chuirfear ar aghaidh ansin le faomhadh an rialtais.
Tá an fhoirm ar líne beo ón 2 Meán Fómhair, agus is é inniu Lá Suirbhé Píolótach Daonáirimh go hoifigiúil.
Cé go bhfanfaidh an suirbhé ar líne oscailte anocht, tá daoine á spreagadh, nuair is féidir, a gcuid foirmeacha a líonadh inniu.
