Steve Carson ceaptha ina Stiúrthóir Físeáin ag RTÉ
![](https://img.rasset.ie/002084d9-1600.jpg)
Tá sé fógartha ag RTÉ go bhfuil Steve Carson ceaptha mar Stiúrthóir Físe – ról a dúirt an craoltóir a bheith “ríthábhachtach” in athmhúnlú agus claochlú RTÉ.
Rachaidh an tUasal Carson, atá pósta le láithreoir Prime Time, Miriam O’Callaghan, le Foireann Ceannaireachta RTÉ nuair a rachaidh sé i mbun a ról san fhómhar.
Faoi láthair tá sé ina Stiúrthóir ar BBC Scotland, áit a bhfuil sé i gceannas ar fhoirne Teilifíse, Raidió agus Ar Líne na heagraíochta ar fud na hAlban.
Bhí an tUasal Carson ina Stiúrthóir Clár do Theilifís RTÉ roimhe seo, agus bhog sé go BBC Thuaisceart Éireann mar Cheann Léiriúcháin, agus ansin go BBC Scotland.
Dúirt Kevin Bakhurst, Ard-Stiúrthóir, RTÉ, go bhfuil taithí agus cuntas teiste an Uasail Carson ann “le fíor-rath a bhaint amach i ngach seánra”.
“Cabhróidh scileanna cruthaithe Steve ach go háirithe linn straitéis eagarthóireachta chuimsitheach a chur le chéile agus a chur i bhfeidhm ar fud gach stáisiún teilifíse de chuid RTÉ agus Seinnteoir RTÉ,” a dúirt an tUasal Bakhurst.
Dúirt an tUasal Carson go bhfuil sceitimíní air a bheith ar an bhfoireann ceannaireachta nua in RTÉ. “Tá sé an bheannaigh mé a bheith ag obair le foireann iontach i BBC Scotland, ag cabhrú chun tacú le clárdhéantóirí obair iontach a dhéanamh dár lucht éisteachta,” a dúirt sé. “Tá mé ag súil leis an rud céanna a dhéanamh leis an tallann chruthaitheach den scoth atá againn in Éirinn agus muid ag díriú ar an straitéis uaillmhianach New Direction a sheachadadh.”
Beidh an tUasal Carson in éineacht le Patricia Monahan a fógraíodh inniu mar Stiúrthóir Fuaime nua RTÉ.
Tá sí ina hEagarthóir Bainistíochta ag Newstalk faoi láthair, áit a stiúrann sí ábhar thar ardáin uile an stáisiúin, agus bhí sí freagrach as straitéis ábhair an stáisiúin a cheapadh, a fhorbairt agus a chur i bhfeidhm.
![](https://img.rasset.ie/002084da-614.jpg?ratio=1.78)
Tá Ms Monahan ina ball freisin d’Fhoireann Sinsearach Ceannaireachta Bauer Media Audio Ireland.
Beidh sí freagrach as seirbhísí fuaime agus digiteacha-fuaime RTÉ a fhorbairt agus a bhainistiú, lena n-áirítear cláir na gceithre stáisiún raidió FM – RTÉ Raidió 1, RTÉ 2fm, RTÉ Raidió na Gaeltachta agus RTÉ lyric fm – in éineacht le cúrsaí digiteacha, ar líne, agus seirbhísí podchraoltaí.
Dúirt Ms Monahan go bhfuil sí ag tnúth le bheith ag obair le RTÉ sa ról nua.
“Tá ról an-suntasach ag RTÉ cheana féin mar chraoltóir seirbhíse poiblí ar chúrsaí fuaime in Éirinn,” a dúirt sí. “Táim ag tnúth le bheith ag obair le mo chomhghleacaithe nua go léir chun an phunann a fhorbairt ionas go leanfaidh sé ar aghaidh ag comhlíonadh an róil sin do na glúnta atá le teacht”.