Tá sé beartaithe ag an Rialtas suas le 350 ball foirne príosúin sa bhreis a earcú mar chuid d’ardú “suntasach” ar mhaoiniú Sheirbhís Phríosúin na hÉireann.
Tá sé mar chuid de phacáiste €3.9 billiún don earnáil dlí agus cirt a fógraíodh mar chuid de Bhuiséad 2025.
Áireofar leis sin fosta go n-earcófar suas le 1,000 garda breise, agus suas le 150 ball foirne sibhialtach de chuid an Gharda Síochána.
Idir an dá linn, d’fhógair an tAire Caiteachais Phoiblí Paschal Donohoe leathnú “suntasach” ar an gcóras próiseála cosanta idirnáisiúnta, lena n-áirítear earcú 400 ball foirne breise.
Gheobhaidh eagraíochtaí a sholáthraíonn tacaíochtaí d’íospartaigh foréigin ghnéas-bhunaithe agus inscne €7m sa bhreis freisin, a dúirt sé.
Ina theannta sin, d’fhógair an tAire leithdháileadh maoinithe de €1.35bn d’Óglaigh na hÉireann.
D’fhágfadh sé seo go bhféadfaí cláir mhóra uasghrádaithe a chur chun cinn do threalamh agus bonneagar cosanta.
Áirítear leis seo éide fheabhsaithe Óglaigh na hÉireann.
Idir an dá linn bheadh infheistíocht i bhfógraíocht le haghaidh earcaíochta, agus é mar aidhm earcú, oiliúint agus tacú le glanmhéadú de 400 ball breise d’Óglaigh na hÉireann an bhliain seo chugainn.
Léigh níos mó:
Beo: Nuashonruithe de réir mar a tharlaíonn siad
Na scéalta is déanaí faoi Bhuiséad 2025
