Tá roinnt tacaíochtaí fógartha ag an Rialtas chun cabhrú le gnólachtaí beaga mar chuid de Bhuiséad 2025.
“Is iad gnólachtaí, idir bheag agus mhór, croí an tsaoil dár ngeilleagar, agus tá an Rialtas seo tiomanta do thacaíocht a thabhairt do ghnólachtaí ionas gur féidir leo leanúint ar aghaidh ag fás, ag nuálaíocht agus ag cruthú fostaíochta,” a dúirt an tAire Airgeadais Jack Chambers ina óráid buiséid.
Ar an gcreidmheas cánach Taighde agus Forbartha, beidh méadú ar thairseach íocaíochta na chéad bhliana ó €50,000 go €75,000.
Dúirt an tAire Chambers go gcuirfidh sé seo tacaíocht bhreise ar fáil do chuideachtaí atá ag tabhairt faoi thionscadail T&F níos lú nó a bheidh ag gabháil don chreidmheas den chéad uair.
Tá sé fógartha ag an Rialtas freisin go gcuirfear síneadh le trí scéim ghnó a chabhraíonn le cuideachtaí maoiniú a mhealladh.
Déanfar an Dreasacht Infheistíochta Fostaíochta, an Faoiseamh Gnólachtaí Nuathionscanta d’Fhiontraithe agus an Dreasacht Caipitil do Ghnólachtaí Nuathionscanta a shíneadh go ceann dhá bhliain eile, go dtí deireadh 2026.
Idir an dá linn, déanfar an méid ar féidir le hinfheisteoir faoiseamh a éileamh air faoin Dreasacht d’Infheisteoir Fostaíochta a dhúbailt ó €500,000 go dtí €1 milliún.
Méadófar an faoiseamh faoin scéim um Fhaoiseamh do Ghnólachtaí Nuathionscanta d’Fhiontraithe ó €700,000 go €980,000.
Déanfar leasú ar an bhfaoiseamh ó Cháin Ghnóchan Caipitiúil atá dírithe ar infheisteoirí i ngnólachtaí nuathionscanta nuálacha.
Déanfaidh sé foráil do theorainn mhéadaithe saoil ar ghnóthachain lena mbaineann an faoiseamh ó €3m go €10m.
Cuirfear tús leis an bhfaoiseamh, a fógraíodh anuraidh, “go luath”, a dúirt an tAire.
Dúirt an tAire Chambers go bhfuil “castacht shuntasach” curtha leis an gcód cánach corparáide le blianta beaga anuas mar gheall ar fhorbairtí agus gealltanais idirnáisiúnta.
Mar thoradh air sin, tá an Rialtas ag tabhairt isteach díolúine rannpháirtíochta do dhíbhinní eachtracha.
Tiocfaidh an beart i bhfeidhm ón 1 Eanáir an bhliain seo chugainn.
“Cuirfidh sé meicníocht mhalartach, i bhfad níos simplí ar fáil le haghaidh faoiseamh cánach dúbailte do ghnólachtaí ilnáisiúnta,” a dúirt sé.
“Leanfaidh obair ar aghaidh sa bhliain amach romhainn ar dhíolúintí rannpháirtíochta, lena n-áirítear tuilleadh machnaimh ar raon feidhme geografach agus ar dhíolúine ó bhrainsí eachtracha,” a dúirt sé.
Tá athruithe fógartha ag an Rialtas freisin ar an bhfaoiseamh do chuideachtaí beaga faoi alt 486C ó cháin chorparáide trí mhodh nua a thabhairt isteach chun go gcáileoidh cuideachtaí don fhaoiseamh faoi threoir ÁSPC Aicme S.
Leathnóidh sé sin raon feidhme an fhaoisimh chuig cuideachtaí nua-thionscanta beaga arna mbainistiú ag úinéirí.
I gcás gnólachtaí a bheidh ag méadú de réir a chéile, beidh faoiseamh nua ann do chostais a thabhaítear maidir le céadliostú ar stocmhalartán na hÉireann nó na hEorpa, faoi réir uasteorann de €1m.
Sa bhliain amach romhainn, dúirt an tAire Chambers go dtabharfaidh an Roinn isteach díolúine ó Dhleacht Stampa, faoi réir breithniú a dhéanamh ar Chúnamh Stáit.
“Chuirfeadh an beart seo ar chumas FBManna Éireannacha rochtain a fháil ar chothromas trí ardáin trádála airgeadais atá deartha chun tacú lena riachtanais mhaoinithe,” a dúirt sé.
