Téann baill cheardchumann Connect ar stailc
![](https://img.rasset.ie/00204e39-1600.jpg)
Tá baill den cheardchumann Connect i mbun stailce inniu ag an gcomhlacht soilsithe sráide Enerveo, a chuireann seirbhísí ar fáil do roinnt údarás áitiúil.
Tá an beart á dhéanamh mar chuid d'aighneas faoi íocaíochtaí iomarcaíochta.
“D’fhógair Enerveo le déanaí go raibh sé ag tabhairt a cuid oibríochtaí in Éirinn chun críche agus nach mbeidh siad ag iarraidh tairiscint a dhéanamh ar aon cheann dá gconarthaí reatha,” a dúirt Ard-Rúnaí Connect, Paddy Kavanagh.
“Tá an chuideachta ag diúltú íocaíochtaí iomarcaíochta a sholáthar dá lucht oibre ar aon dul leo siúd a soláthraíodh roimhe seo san earnáil,” a dúirt an tUasal Kavanagh.
Vótáil baill de Connect i bhfabhar stailce i mballóid a reáchtáladh an mhí seo caite agus seirbheáladh fógra faoi ghníomhaíocht thionsclaíoch ar an gcuideachta don Luan 8 Iúil.
Cuireadh an beart ar athló ar dtús ar feitheamh cainteanna a bhí dírithe ar réiteach a fháil ar an aighneas ach bhris na cainteanna inné.
Cuirfear tús le stailc éiginnte ar maidin le picéid á gcur ag láithreacha ina ndéanann an chuideachta a cuid oibre lena n-áirítear iostaí Enerveo, údaráis áitiúla agus roinnt tionscadal tógála.