Thit praghsanna mórdhíola leictreachais – na praghsanna a íocann soláthróirí le gineadóirí – beagnach 30% sna 12 mhí go dtí Aibreán, a léiríonn figiúirí is déanaí ón bPríomh-Oifig Staidrimh inniu.
Tháinig ardú mór ar phraghsanna mórdhíola leictreachais sa tréimhse tar éis ionradh na Rúise ar an Úcráin, agus léiríonn figiúirí an lae inniu go bhfuil siad tite siar beagnach 60% ó Aibreán 2022 agus 77% ó bhuaicphointe i mí Lúnasa 2022.
Dea-scéala iad na figiúirí do thomhaltóirí tí atá in ann a bheith ag súil le tuilleadh ciorruithe ar na rátaí atá á n-íoc acu ar a gcuid leictreachais.
Níos luaithe an mhí seo, dúirt an Coimisiún um Rialáil Fóntas go bhfuil sé ag súil le laghdú breise praghais ó sholáthróirí sna míonna amach romhainn.
Dúirt an rialtóir freisin, áfach, nach dócha go bhfillfear ar leibhéil na bpraghsanna miondíola mar iad siúd in 2021 mar go bhfuil praghsanna mórdhíola fuinnimh fós níos airde ná mar a bhí siad ag an am sin.
Léiríonn figiúirí an Phríomh-Oifig Staidrimh inniu freisin go raibh ardú 2.3% ar an Innéacs Táirgí Fuinnimh foriomlán ó mhí an Mhárta ach gur thit sé 21.3% i gcomparáid le Aibreán na bliana seo caite.
Idir an dá linn, d'ardaigh praghsanna táirgeoirí do tháirgí bia 0.5% le linn na míosa ach thit siad 6.6% i gcomparáid leis an am céanna anuraidh.
Dúirt an Phríomh-Oifig Staidrimh gur thit praghsanna táirgeoirí ar tháirgí déiríochta 0.4% i mí Aibreáin i gcomparáid le Márta, agus iad síos 22.1% ar Aibreán 2023.
I measc na gcatagóirí bia eile a léirigh athruithe suntasacha i mí Aibreáin bhí Táirgí Bia Eile, a thit 6.8%, agus muilleoireacht gráin, stáirsí agus bianna ainmhithe, a bhí síos 5.7%. Ach d’ardaigh praghsanna mórdhíola éisc agus táirgí éisc 6.9%.
