D'urghabh oifigigh de chuid na gCoimisinéirí Ioncaim, le cúnamh ó ghardaí, cannabas ar luach measta níos mó ná €16 milliún ag Europort Ros Láir.
Thángthas ar thart ar 783kg de channabas luibhe agus 70kg de roisín cannabais in aonad lastais gan tionlacan.
Dúirt na Coimisinéirí Ioncaim gur tháinig an t-aonad ar bhád farantóireachta a thaistil ó Bilbao sa Spáinn.
Déanfaidh Eolaíocht Fhóiréinseach Éireann anailís ar na drugaí.
Ní dhearnadh aon ghabháil, dar leis na gardaí.
Dúirt siad go bhfuil imscrúduithe ar bun.
Bhí an oibríocht mar thoradh ar phróifíliú riosca le cúnamh ón madra braite Jasper agus scanóir x-gha, a dúirt na Coimisinéirí Ioncaim.
Tá an urghabháil mar chuid d’oibríochtaí leanúnacha na gCoimisinéirí Ioncaim a dhíríonn ar ghrúpaí coireachta eagraithe agus ar allmhairiú drugaí mídhleathacha.
