Tá sé ráite ag ceannaire an Lucht Oibre, Ivana Bacik, go bhfuil ag teip ar phlean Tithíochta do Chách an Rialtais ar gach méadrach, le 4,401 leanbh ina gcónaí i gcóiríocht éigeandála anois.
Ag labhairt di sa Dáil, dúirt sí go raibh ardú 70% ar easpa dídine leanaí ó chuaigh an Rialtas i mbun oifige, agus gur dócha go dtiocfaidh ardú ar an bhfigiúr nuair a fhoilseofar figiúirí Lúnasa an tseachtain seo chugainn.
Dúirt TD Chuan Bhaile Átha Cliath Theas gur chruthaigh na sonraí nach bhfuil a dhualgas cúraim do leas an oiread sin leanaí comhlíonta ag an Rialtas.
Mhaígh an Teachta Bacik go bhfuil teipthe ar chíosóirí ag an Rialtas chomh maith agus méadú 27% ar chíosanna le 3 bliana anuas, díreach mar a bhí ardú tagtha ar phraghsanna tithe freisin.
D’achomharc sí ar an Rialtas a pholasaí a athrú sa ghearr ama a bhí fágtha aige in oifig.
Mar fhreagra, dúirt an tAire Tithíochta Darragh O’Brien gurb é deireadh a chur le heaspa dídine a phríomhdhúshlán, ach go raibh sé “dóchasach” mar go raibh líon na ndaoine a d’fhág cóiríocht éigeandála “ag méadú go substaintiúil”.
Dúirt sé gur bhog 630 teaghlach isteach i dtithe sábháilte sa dara ráithe den bhliain seo.
Dúirt an tAire go raibh líon na dtithe sóisialta nua a seachadadh anuraidh ar an líon is airde le breis agus 50 bliain.
Dúirt sé go mbainfidh an Rialtas “ár spriocanna sóisialta amach i mbliana”.
Dúirt an tAire O'Brien nach raibh aon chostas ar cíos nuair a chuaigh an Rialtas seo in oifig ach go raibh 2,000 tionóntacht i bhfeidhm anois.
Dúirt sé freisin go raibh 500 ceannaitheoir céaduaire in aghaidh na seachtaine ar an líon is airde ó 2006 i leith.
Dúirt ceannaire an Lucht Oibre nach raibh líon na ndaoine a d’fhág gan dídean ag coinneáil suas leo siúd a bhí ag teacht isteach.
Dúirt sí go raibh 23,000 fógra scoir le 12 mí roimhe sin, agus go raibh ar an Rialtas glacadh le polasaí Pháirtí an Lucht Oibre chun an treocht a aisiompú.
Dúirt an tAire O'Brien go gcaithfeadh an Rialtas €242 milliún ar sheirbhísí éigeandála i mbliana, agus gur dócha go mbeidh buiséad forlíontach ann.
Dúirt sé go raibh sé mar thosaíocht cabhrú le daoine éirí as easpa dídine agus go leanfadh sé sin mar a bhí.
Tacaíocht cíosa do dhídeanaithe ón Úcráin
Dúirt an tAire O’Brien leis an Dáil freisin go bhfuil athbhreithniú á dhéanamh ar an Íocaíocht Aitheantais Cóiríochta (ARP), tacaíocht cíosa do dhídeanaithe ón Úcráin.
“Táthar ag breathnú air sin,” a dúirt sé le TD Shinn Féin Pearse Doherty.
Dúirt an Teachta Doherty, agus €800 sa mhí saor ó cháin á chur ar fáil do dhídeanaithe ón Úcráin ar chóiríocht, go bhfuil an ARP “ag praghsáil gnáthchíosóirí as an margadh”.
“Is léir go bhfuil sé éagórach,” a dúirt sé.
