Tá Gardaí ag leanúint le beirt a cheistiú maidir le bás fir 27 bliain d'aois i gCo. Loch Garman.
Fuarthas corp Stephen Ring san uisce ag Loch Charraig Phuill, áit a bhfuil an-tóir air in aice le baile Loch Garman.
Tá an limistéar ag an loch ina bhfuarthas corp an Uasail Ring tráthnóna inné fós séalaithe.
Gabhadh fear ina 40idí agus bean ina 30í inné.
Tá siad á gcoinneáil ag stáisiún gardaí faoi Alt a ceathair den Acht um Cheartas Coiriúil.
Tugadh corp an Uasail Ring go dtí an t-ospidéal i gCo. Phort Láirge agus táthar ag súil go ndéanfar scrúdú iarbháis níos déanaí inniu.
Tuairiscíodh go raibh an tUasal Ring ar iarraidh ar 15 Deireadh Fómhair.
Tá an ceantar inar thángthas ar a chorp i bhfad ón áit ar chonacthas go deireanach é i mbaile Loch Garman go luath ar an 15 Deireadh Fómhair.
Tá Oifigeach Sinsearach Imscrúdaithe ceaptha chun an t-imscrúdú a stiúradh agus tá seomra teagmhais bunaithe ag Stáisiún Garda Loch Garman.
Tá Oifigeach Idirchaidrimh Teaghlaigh de chuid an Gharda Síochána sannta chun tacú le teaghlach an fhir nach maireann.
Dúirt Gardaí go bhfuil imscrúduithe ar bun.
