Rachaidh pluiméirí, feisteoirí, táthairí agus printísigh atá ina mball den cheardchumann Unite ag piocadh roinnt láithreán tógála ar fud na tíre arís inniu.
Tá sé mar chuid d’fheachtas atá ag iarraidh ciorruithe ar na chéad uair an chloig den am taistil a cuireadh i bhfeidhm le linn na tréimhse tar éis na timpiste airgeadais in 2008 a athbhunú.
Is é an dara Aoine as a chéile a chuaigh na hoibrithe ar stailc mar gheall ar an gceist.
Is iad na láithreacha a roghnófar ná tionscadail tógála de chuid an chomhlachta cógaisíochta Pfizer i gCaisleán na Gráinsí i mBaile Átha Cliath agus i Rinn an Scidígh i gCorcaigh.
Níl na picéid dírithe ar Pfizer, ach ar bhaill den Chumann Conraitheoirí Innealtóireachta Meicniúla & Seirbhísí Foirgníochta (MEBSCA) atá ag déanamh oibreacha ar na láithreacha faoi láthair.
Tá sé ráite cheana ag MEBSCA go bhfuil an chéad uair an chloig ama taistil ionchorpraithe i rátaí in aghaidh na huaire ó 2011 mar chuid de chomhaontú ar thángthas air le Unite.
Dúirt siad go raibh d'éifeacht ag an gcomhaontú an ráta in aghaidh na huaire a mhéadú, rud a d'fhág gur íocadh ráta níos airde as ragobair agus laethanta saoire.
Tá sé maíte ag an gcumann go bhfuil Unite anois ag iarraidh an ráta pá níos airde a choinneáil agus ag an am céanna ag iarraidh an comhaontú a rinne Unite faoi shaoirse ag an am sin a aisiompú.
D'iarr MEBSCA ar an gceardchumann dul i mbun cainteanna, éileamh a ndearna Unite cur síos air mar rud mealltach mar go ndeir sé gur dhiúltaigh an eagraíocht dul i mbun cainteanna agus tairiscint bhríoch a dhéanamh.
Thosaigh na picéid ag meán oíche agus beidh siad ar siúl ar feadh beagnach 24 uair an chloig.
An tseachtain seo caite, bhí stop 24 uair an chloig oibre buailte ag tionscadail tógála do mhórchuideachtaí lena n-áirítear Intel, Diageo, Eli Lilly, Analog agus an ESB.
