Tá tús curtha le hathbhreithniú Garda ar chomhaid a bhaineann le tine Stardust 1981.
I mí Aibreáin seo caite, dúirt Coimisinéir an Gharda go raibh sé de chúram ar Bhiúró Náisiúnta an Gharda Síochána um Imscrúdú Coiriúil dhá chomhad imscrúdaithe a cuireadh faoi bhráid an Stiúrthóra Ionchúiseamh Poiblí i 1981 agus 2016 a scrúdú.
Dúradh i ráiteas ó na gardaí inniu go bhfuil téarmaí tagartha an athbhreithnithe socraithe agus go bhfuil tús curtha leis an athbhreithniú anois.
Níos luaithe i mbliana, thug giúiré ionchoisne fíoraisc maidir le marú neamhdhleathach ar an 48 duine ar fad a maraíodh i dtine chlub oíche Artane.
Dúirt gardaí inniu go ndéanfar an scrúdú agus aird á tabhairt ar Thuarascáil an Chróinéara ar fhíoraisc maraithe neamhdhleathacha, agus aon ábhair a thabharfaidh an cróinéir ar aird an Gharda Síochána de réir an Mheabhráin Tuisceana idir an Garda Síochána agus an Cróinéir. cróinéir.
Dúirt siad freisin go bhfuil imlíne tugtha ag foireann athbhreithnithe an Gharda Síochána ar an bpróiseas athbhreithnithe d’ionadaí na dteaghlach agus go gceapfar Oifigeach Idirchaidrimh Teaghlaigh in am trátha.
Críochnaíonn an ráiteas ag rá go bhfuil smaointe gach duine sa Gharda Síochána le teaghlaigh na n-íospartach, chomh maith leis na daoine a tháinig slán as tragóid Stardust.
