Tá dréachtchód nua agus rialacha nua do sheirbhísí fís-ar-éileamh foilsithe ag an rialtóir meán, Coimisiún na Meán.
Áiríonn sé bearta chun leanaí a chosaint ó rochtain a fháil ar ábhar gnéasach míchuí nó foréigneach.
Tá na rialacha dírithe ar ábhar a d’fhéadfadh foréigean nó fuath a spreagadh in aghaidh grúpa, nó ball de ghrúpa bunaithe ar a saintréithe, lena n-áirítear gnéas, cine, dath, míchumas, claonadh gnéasach nó ballraíocht de mhionlach náisiúnta.
Díríonn an cód freisin ar ábhar a bhféadfaí féachaint air mar spreagadh chun cion sceimhlitheoireachta a dhéanamh.
I measc na mbeart bheadh rabhaidh ar an scáileán a sholáthar ag tús clár maidir le hábhar a d’fhéadfadh dochar a dhéanamh do leanaí.
Ní mór do sholáthraithe bearta cuí a ghlacadh freisin chun a chinntiú nach dtaispeánfar ábhar ina bhfuil pornagrafaíocht nó foréigean gan ghá do leanaí.
Leis na dréacht-rialacha tugtar isteach oibleagáidí ar sholáthraithe seirbhísí físeáin ar éileamh a gcuid clár a dhéanamh inrochtana do dhaoine faoi mhíchumas de réir a chéile.
Nuair a bheidh siad tugtha chun críche, beidh feidhm ag na rialacháin nua maidir le soláthraithe seirbhíse físeáin ar éileamh a bhfuil a gCeanncheathrú san AE in Éirinn.
Sainmhíníonn an rialtóir ‘ar éileamh’ mar sheirbhís meán a dhéanann foráil d’fhéachaint ar chláir a roghnaíonn an t-úsáideoir faoi láthair agus arna iarraidh sin dó féin ar bhonn catalóg clár a roghnaíonn an soláthraí seirbhíse meán.
Tá an dréachtchód agus na rialacha oscailte faoi láthair le haghaidh comhairliúcháin phoiblí agus is é an 6 Lúnasa an dáta deiridh le haghaidh aighneachtaí.
“Nuair a bheidh sé tugtha chun críche, ceadóidh ár gCód agus Rialacha nua don chéad uair rialú reachtúil a dhéanamh ar sholáthróirí seirbhísí Fís-Ar-Éileamh atá lonnaithe in Éirinn,” a dúirt Rónán Ó Domhnaill, Coimisinéir Forbartha Meán Choimisiún na Meán.
“Cuideoidh an Cód le hiarrachtaí a chinntiú gur féidir le daoine ar fud na hÉireann féachaint ar chláir shiamsaíochta, fhaisnéiseacha agus mhealltacha ar éileamh, agus ag an am céanna ag cinntiú nach bhfaigheann leanaí rochtain ar chláir atá mí-oiriúnach ó thaobh aoise de.”
“Cinnteoidh na Rialacha go nglacfar gach céim chun a chinntiú go mbeidh na cláir inrochtana do dhaoine faoi mhíchumas agus cuirfear iallach ar gach soláthraí seirbhíse meán ar-éileamh closamhairc atá lonnaithe in Éirinn plean gníomhaíochta inrochtaineachta a bhunú,” a dúirt an tUasal Ó Domhnaill.
Leigh Nios mo:
Ní leor nó an iomarca? Léiriú ar an gCód Sábháilteachta Ar Líne
