Dúnadh Acropolis na hAithne, an suíomh turasóireachta is mó a bhfuil cuairt á tabhairt air sa Ghréig, don phobal le linn na n-uaireanta is teo ar an lá mar gheall ar thonn teasa a bhí ag scuabadh na tíre.
Bhí sé ráite ag an Aireacht Cultúir go ndúnfaí an láithreán seandálaíochta atá liostaithe ag UNESCO ó mheán lae go dtí 5pm am na Gréige (10rn go 3in am na hÉireann), agus meastar go sroichfidh an teocht 43 céim Celsius inniu agus amárach.
Tá an chéad tonn teasa den bhliain sa Ghréig, a bhuailtear go rialta ag teochtaí géara an tsamhraidh, le buaicphointe sa tréimhse seo, agus dúirt an aireacht go bhféadfaí an beart a leathnú.
Tá foláireamh tugtha ag an aireacht um ghéarchéim na haeráide agus um chosaint shibhialta go bhfuil baol an-ard dóiteáin ann i réigiún Attica timpeall na hAithne.
Fanfaidh scoileanna dúnta i roinnt réigiún den tír, lena n-áirítear sa phríomhchathair, agus chomhairligh an aireacht saothair d’fhostaithe na hearnála poiblí oibriú ón mbaile.
Osclaíodh halla aerchóirithe ag stáisiún meitreo Syntagma i lár na hAithne chun foscadh a thabhairt don phobal ón teas, a dúirt an t-údarás iompair phoiblí.
B’éigean an Acropolis a dhúnadh i mí Iúil anuraidh le linn thonn teasa coicíse nach bhfacthas riamh roimhe ina ré.
Tháinig an líon is airde riamh de bheagnach ceithre mhilliún cuairteoir chuig an suíomh anuraidh, agus tháinig méadú ar an éileamh atá air i bpáirt mar gheall ar thurasóirí a tháinig ar longa cúrsála ag bualadh isteach ag calafort Piraeus in aice láimhe.
