Tá €230 milliún i ndeontais chaipitil spóirt fógartha ag an Rialtas do chlubanna agus áiseanna ar fud na tíre.
Seo an figiúr is mó riamh agus 50% níos airde ná dhá bhliain ó shin.
Faomhadh 1,996 deontas ar leith a chlúdaigh 40 spórt éagsúil.
Rinne airí ó thrí pháirtí an chomhrialtais fógra foirmiúil ar maidin inniu.
Nuair a fiafraíodh de an raibh uainiú na nuachta le tarlú díreach roimh thoghchán, dúirt an tAire Spóirt Catherine Martin go raibh sé beartaithe i gcónaí é a fhógairt faoin tráth seo.
Dúirt sí freisin go raibh méadú freisin ar an bhfigiúr iomlán a fógraíodh dhá bhliain ó shin.
“Is aitheantas é seo ar luach an spóirt agus ar luach na hinfheistíochta sa spórt.”
Dúirt an tAire Stáit Thomas Byrne gur tháinig iarratais isteach ó mhí na Bealtaine agus gur thóg sé am iad a phróiseáil.
“Is maoiniú é seo a bhí á lorg agus ag teastáil go géar ó chlubanna agus pobail ar fud na tíre,” a dúirt sé.
An bhfuair do chlub maoiniú? Cliceáil anseo chun an liosta iomlán a fheiceáil
Bhí fearg ar Fhine Gael inné go raibh roinnt Teachtaí Dála de chuid Fhianna Fáil tar éis an lánchosc a bhriseadh chun tionscadail áitiúla a fhógairt ina gceantair.
Dúirt an tAire Caiteachais Phoiblí Paschal Donohoe nach ndéanfadh sé cur síos ar an iompar sin mar rud “cuiditheach”.
Dúirt sé áfach go raibh na trí pháirtí comhrialtas ag obair go maith le chéile.
