Tá an Rialtas chun rialtóir nua a bhunú chun maoirseacht a dhéanamh ar thógáil foirgneamh.
Beidh cumhachtaí iniúchta agus forfheidhmithe ag an Údarás Rialála um Chaighdeáin Foirgnimh agus beidh raon smachtbhannaí ar fáil dó.
Lorgóidh an tAire Tithíochta Darragh O’Brien cead ón gComh-Aireachta inniu chun an rialtóir nua a bhunú.
Moladh an chéim seo faoi straitéis Tithíocht do Chách an Rialtais.
Beidh maoirseacht ag an gcomhlacht freisin ar mhargaíocht agus úsáid táirgí foirgníochta.
Tá sé mar aidhm leis an riosca teipeanna tógála agus lochtanna athfhillteacha a laghdú.
Táthar ag súil go méadóidh an comhlacht nua muinín an phobail i gcúrsaí tógála.
Is dócha go mbeidh reachtaíocht phríomha ag teastáil ón údarás.
Agus an reachtaíocht á dréachtú agus á cur tríd an Oireachtas bunófar Gníomhaireacht eatramhach um Chaighdeáin Fhoirgníochta le hordú chun forbairt struchtúr rialachais agus bainistíochta a bhrostú.
Méadóidh sé freisin an acmhainn iniúchta trí fhoireann theicniúil a earcú chun tacú le húdaráis áitiúla.
Pléifidh an Comh-Aireachta tuarascáil nua freisin a mholfaidh sprioc náisiúnta chun probháid agus tíolacadh a thabhairt chun críche laistigh d’ocht seachtaine.
Tá an fhorbairt mar chuid d’iarracht costais agus moilleanna a laghdú agus stoc tithíochta a chur ar fáil níos tapúla ná mar atá sé faoi láthair.
Tabharfaidh an Taoiseach Simon Harris meamram os comhair na Comhaireachta ar maidin ón nGrúpa Saineolaithe ar Phrobháid agus Tíolacadh.
Aithníodh obair na ngrúpaí a bheith riachtanach sa phlean gníomhaíochta Tithíocht do Chách chun costais agus moilleanna a laghdú
Foilseofar an tuarascáil agus molfaidh sí sprioc náisiúnta ocht seachtaine maidir le probháid agus tíolacadh, tuilleadh digitiú ar na próisis, athrú dlíthiúil chun próisis atá as dáta a bhaint agus feachtais feasachta poiblí ar na próisis.
Ar leithligh, tá an Rialtas chun straitéis sé bliana a fhoilsiú inniu chun torthaí oideachais a fheabhsú do dhaoine óga an Lucht Siúil agus na Romach.
Tabharfaidh an tAire Oideachais Norma Foley meamram chuig an gComh-aireachta ar maidin ar an gceist.
Déarfaidh sé, cé go bhfuil feabhas tagtha le blianta beaga anuas ar líon na ndaoine óga den Lucht Siúil agus na Romach a chríochnaíonn sa tSraith Shinsearach i scoileanna, go bhfuil a dtorthaí oideachais níos ísle fós ná an daonra i gcoitinne.
Áiríonn an straitéis sprioc chun líon na ndaoine óga den Lucht Siúil agus Romaigh a fhanann ar scoil go dtí an séú bliain agus an Ardteistiméireacht a bhaint amach a mhéadú go suntasach.
Leanann an straitéis comhairliúchán suntasach le leanaí den Lucht Siúil agus Romaigh, tuismitheoirí agus grúpaí ionadaíocha.
