Tá plean chun an chéad raon rothaíochta faoi dhíon in Éirinn a thógáil in iarthar Bhaile Átha Cliath tar éis an solas glas a thabhairt ag an Aire Spóirt.
Tá an rian 250 méadar le tógáil ag an gCampas Náisiúnta Spóirt i mBaile an Aba, Baile Átha Cliath agus tá sé le bheith críochnaithe in 2027.
Áireofar sa tionscadal freisin 12 chúirt badmantan sa limistéar in-rian, agus cuimseoidh sé suíocháin do lucht féachana agus áiseanna coimhdeacha ar nós giomnáisiam.
Tá sé ráite ag an Aire Catherine Martin go gcuirfidh an t-ionad “saoráidí rothaíochta den scoth ar fáil dár lúthchleasaithe rothaíochta a bhfuil orthu taisteal thar lear faoi láthair le haghaidh oiliúna agus iomaíochta araon.
Dúirt sí freisin go soláthróidh sé “spórt an badmantan le teach buan ina mbeidh oiliúint chomhtháite, giomnáisiam agus áiseanna leighis”.
Tá fáilte curtha ag Príomhfheidhmeannach Spórt Éireann, a dhéanann maoirsiú ar an gCampas Náisiúnta Spóirt, roimh an bhforbairt.
Chuir an Dr Úna May síos ar an tionscadal mar “an saghas infheistíochta leanúnach go díreach atá fíor-riachtanach chun rannpháirtíocht ó bhun aníos go lúthchleasaithe den scoth a mhéadú”.
Feabhsóidh an t-ionad freisin seans rothaithe Éireannacha ardfheidhmíochta boinn idirnáisiúnta, Oilimpeacha agus Parailimpeacha a fháil amach anseo”, a dúirt an Dr May.
