Tá fógra trí seachtaine tugtha ag Cumann na nAltraí Síciatracha d'Fheidhmeannacht na Seirbhíse Sláinte faoi thosú gníomhaíochta tionsclaíche maidir leis an lánchosc earcaíochta a tugadh isteach i mí na Samhna seo caite.
Tá ballraíocht idir 6,500 agus 7,000 duine ag an PNA.
Le trí seachtaine anuas, vótáil 96% acu i bhfabhar gníomhaíocht thionsclaíoch de bharr lánchosc earcaíochta FSS.
Deir an ceardchumann go bhfuil a gcuid altraí i “suíomh dodhéanta” maidir le seirbhísí meabhairshláinte a sholáthar agus nach faoi phá atá an beart tionsclaíochta seo ach faoi chúram othar.
Dhiúltaigh FSS seirbhísí meabhairshláinte a dhíolmhú ón lánchosc earcaíochta.
Nuair a tugadh isteach an lánchosc anuraidh, mheas an PNA thart ar 300 folúntas d’altraí síciatracha ar fud na tíre.
De réir an daonáirimh is déanaí atá déanta acu ar oibrithe san earnáil mheabhairshláinte, tá níos mó ná 725 folúntas d’altraí síciatracha ar fud na tíre.
I ráiteas, dúirt an FSS, in ainneoin an tsosa earcaíochta, gur tháinig méadú ar líon na n-altraí síciatracha atá fostaithe ag FSS sna chéad trí mhí ó reo an fhostú.
Dúirt an FSS leis gur bhuail siad le déanaí leis an PNA agus go leanfaidh siad ag plé leo.
Dúirt Ard-Rúnaí an PNA, Peter Hughes, go bhfuil seirbhísí meabhairshláinte “ag pointe criticiúil” agus tá sé ag tabhairt foláirimh go bhféadfaí tuilleadh seirbhísí a dhúnadh ag leibhéal an phobail agus go mbeadh baol suntasach sa phobal agus iontrálacha méadaithe dá bharr.
“Tá fachtóir riosca ann freisin maidir le rialachas cliniciúil le líon na bpost ardaithe céime criticiúla nach bhfuil maolú faighte acu,” a dúirt sé.
Dúirt an tUasal Hughes go bhfuil “tionchar mór ag líon na bhfolúntas ar sholáthar cúraim, ar ídiú na seirbhísí túslíne agus ar an míchumas seirbhísí a fhorbairt”.
Dúirt sé freisin gur fhoilsigh an Coimisiún Meabhair-Shláinte a thuarascáil bhliantúil don bhliain 2023 inné, a d'aimsigh go bhfuil roinnt soláthraithe ionaid ghéarmhíochaine d'othair chónaithe ag streachailt le caighdeáin a chomhlíonadh i réimsí lena n-áirítear soláthar foirne, pleanáil cúraim agus bainistíocht riosca.
“Tá an scéal ar chuir an Coimisiún Meabhair-Shláinte síos air in olcas ó mhí na Samhna seo caite,” a dúirt an tUasal Hughes.
“Tá soláthar seirbhísí bunúsacha síciatracha ar fud na tíre, lena n-áirítear Seirbhísí Meabhairshláinte do Leanaí agus Ógánaigh (CAMHS) ag brath ar ragobair agus ar ghníomhaireachtaí araon.
“Tá an scéal seo neamh-inbhuanaithe agus tá fíor-imní ann go mbeidh dúnadh na seirbhísí mar thoradh ar an scéal faoi láthair.
“Tá sé riachtanach go mbeadh earcú Altraí Síciatracha / Meabhairshláinte díolmhaithe ón reo earcaíochta, mar ábhar práinne.”
